محمد الطيب يكتب … هو الجاكومي مشى الإستاد يشوف (القش) ولا يشيل عينة من (البرسيم) ؟؟

محمد الطيب يكتب … هو الجاكومي مشى الإستاد يشوف (القش) ولا يشيل عينة من (البرسيم) ؟؟

زمان قبل الواتساب لما تجيك رسالة نصية طويلة في التلفون ما بتصلك كلها.
بقول ليك (جزء من النص مفقود).
* أنت بتكون زعلان على (الجزء المفقود) حتى وإن كان (الجزء غير المفقود) شافي وكافي.
* لكن شمار كده بتكون زعلان على (الجزء المفقود).
* وبما أن ذلك كذلك فإن فيديو إقتحام الجاكومي لإستاد المريخ (جزء من النص مفقود) .

* زي أفلام الهنود.
* والله صحي.
* جابو لينا لما كان بتكلم بالتلفون.
* ولابس بدلة.
* وسمعنا (جدادة الخلا).
* قال جدادة الخلا الطردت جدادة البيت.
* لحدي هنا كنا ماشين كويس.
* وتابعنا فتح الباب.
* والشاكوس.
* ولحدي ما جا وقف قدام الزول المنعو من الدخول.
* بعد ذلك تم قطع الفديو.
* ليه؟

* الله أعلم.
* ما شفنا أي حاجة.
* ولا فهمنا الحصل بعد داك شنو.
* الشمار الناقص مشكلة.
* الشمار الناقص بخرب حلة الملاح.
* عموماً .. الجاكومي يفعل الكثير بالمريخ الآن.
* كده سؤال .
* هو الجاكومي جا الإستاد لشنو؟
عندو شنو في الإستاد؟
جا يشوف القش ولا جا يشيل عينة من البرسيم ؟
وليه تم منعه؟
الراجل مريخابي (على الشاكوش).
الزول بقول ليك (أنا هلالابي على السكين) .
لكن (مريخابي على الشاكوش) دي أول مرة نسمع بيها.
أنا صراحة متعاطف مع الجاكومي.
الراجل ما قصر.

جاب ليهم الدعم السريع عشان يعيد ليهم تأهيل الإستاد.
تأهيل ملعب إستاد (المؤتمر الوطني) .
ليه تتم محاربة الجاكومي.
النجيلة دي لو خليتوها لأبو جيبين عشر سنين ما بتطلع.
محاربة المريخاب للجاكومي فيها عدم تقدير.
عموماً اتوقف هنا وسأكمل باقي قصة الجاكومي على القناة نهار اليوم .
و. . و..
المرة دي شاكوش والمرة الجاية مفتاح عجل.
وغايتو السنة دي بالذات يا متنا من الضحك ويا كمان الضحك كتلنا.
محمد الطيب الأمين