· ناس المريخ ديل – عملوا أي حاجة في الدنيا.
· جربوا كل شيء.
· ديل وصلوا مرحلة تأجير مساحات كبيرة في نادي المريخ للجرارات وعربات النقل الكبيرة.
· النادي اجروه.
· ما في زول سألهم.
· جابوا الجاكومي يحارب ليهم الهلال .. قام الجاكومي حارب المريخ.
· عمل ليهم مشاكل بين الرئيس ونائب الرئيس… واقترح ليه منصب من رأسه اسمه (الرئيس المناوب).
· قلب ليهم المريخ عنبر باطنية.
· الجاكومي قسم المجلس.
· وسافر تركيا عشان يجيب (النجيلة).
· وحميدتي شغال فيهم عربي وافرنجي.
· الجاكومي اشتر … بينشن في (الباب) بشيل (الشباك).
· الزول دا لو قعد سنة في المريخ كان المريخ لحق الخرطوم الوطني.
· الخرطوم الوطني هسع بقت تتغلب من القوز والعزوزاب.
· فؤاد نقة اخطر من الجاكومي.
· شالوا الجاكومي.
· تسريبات الجاكومي كترت .. قاموا شالوه.
· الزول خرب ليهم أي شيء .. وكشف المستور.
· باع حمدوك ما يبيع حازم.
· مع الجاكومي شالوا ود الجزيرة.
· ود الجزيرة ذنبو شنو؟
· ود الجزيرة قاعد في قروب المجلس للأيكات الرئيس والقلوب الحمراء.
· اعمل حسابك يا هيثم كابو.
· الجاكومي جاب ليه (قلاب رملة) لاستاد المريخ عاوز يسيطر على المريخ .. مع ان حساب قلاب الرملة (مدفوع).
· الحساب (مدعوم).
· زمان ناس المريخ بقولوا الهلال (مدعوم).
· تتخيلوا هسع ناس المريخ مشوا للدعم ذاتو .. استعانوا بـ (الدعم السريع).
· جابوا (الدعم) السريع نفسه.
· تاني ما اسمع واحد فيكم يقول عن الهلال (مدعوم).
· الهلال لا دعموه بقلاب رملة ولا دعموه بنجيلة تركية.
· لا في ولاية في فترة عبدالرحيم محمد حسين كانت حكومة الولاية بتدفع ليه (3) مليار في كل شهر.
· ولا في جهاز امن مخابرات كان بسجل ليه او بنظم ليه بطولة سيكافا.
· هسع الايام لفت ودارت وبطولة سيكافا بقوا ينظموها في استاد الهلال.
· شفتوا العدل دا كيف؟
· سيكافا في استاد الهلال.
· المريخ انكشف.
· سيف تيري مشى مصر.
· عماد الصيني فسخ عقدو.
· عمار طيفور مشى جنوب افريقيا.
· ورئيس بقعد في البلد لكن ما بقدر يطلع.. ورئيس بقعد برة البلد لكن ما بقدر يدخل البلد..طبيعي في الاوضاع دي يظهر رئيس ابولونين اقصد ابوجيبين.
· والجماعة قاعدين يتكلموا عن هدف شلش في الهلال.
· تيري فات.
· الصيني فات.
· وطيفور فات.
· وكرشوم ذاتو قالوا نتيجة الفحوصات اكدت ان هنالك (عرض) من الهلال.
· الجماعة (الضرب) كتر عليهم.
· عشان كدوا قالوا احسن يعملوا ليهم (اختراعات).
· قالوا يخترعوا.
· يقطعوا ليهم حاجة من رأسهم – المريخ ما فيه شيء.
· قاموا علموا شنو؟ قاموا قالوا السوباط استقال.
· السوباط حركات جمال الوالي دي ما قاعد يعملها.
· تتخيلوا الهلال فيه (9) محترفين . (9) محترفين مرة واحدة.
· مزمل ابوالقاسم ما لقى فيهم أي طريقة.
· لا وكيل.
· ولا اميل.
· قام قال يعمل شنو؟
· قام قال يقول رئيس نادي الهلال استقال.
· البرلوم قاعد ما مشكلة.
· استقال صلاح ادريس.
· ومشى الكاردينال.
· والهلال ما وقف.
· ولا بقيف.
· اصلو ما بنقيف عند زول.
· ناس المريخ جربوا أي حاجة في الدنيا دي.
· أي شيء.
· بالردمية.
· بالظلط.
· بالوحدة.
· بالصهريج.
· بالهوا.
· ما خلوا حاجة.
· رئيس برة البلد.
· وئيس جوة البلد.
· ورئيس ابوجيبين.
· ذكرونا ايام الجماعة ديل كانوا بقولوا (كل شيء لله).. وهم قروش العمرة والحج والزكاة بضربوها.
· خموا أي شيء .. وهم برفعوا شعار (ما لدنيا قد عملنا).
· الدنيا ما خليتوا فيها (قلاب تراب).
· عملوا جمعيتين .. جمعية استاد المريخ وجمعية حديقة الموردة ـ الاولى جابت آدم سوداكال والتانية جابت حازم مصطفى (زرّاف الدموع) وفي النهاية لا بتاع جمعية استاد المريخ بقى رئيس ولا بتاع جمعية حديقة الموردة .. الرئيس بقى زول تاني خالص اسمه ايمن مبارك ابوجيبين .. د ابتاع جمعية (مزمل ابوالقاسم).
· دي قابلتكم يوم في حتة؟
· يا مزمل رؤساء المريخ ديل على كيفك ترصهم زي (الكوتشينة).
· تجر خمسين.
· تفتح غلط.
· تدك الورق.
· بي طريقتكم .. رؤساء الهلال ديل ما لعب.
· قلنا ليكم الهلال نادي الحركة الوطنية.
· ونادي الشعب.
· ونادي الخريجين.
· وابوالديمقراطية ذاتها.
· قعدتوا تغالطوا فينا.
· المريخاب عملوا جمعيتين .. وفي النهاية رئيس النادي جاء عن طريق التعيين.
· الانتخابات عندهم لي يوم الدين ما بتجيب ليها رئيس.
· (كأس) ذاتها اتحيرت وما لقت ليهم حل.
· زارف مصطفى .. جابوا بالانتخاب .. شالتو (كأس).
· جابوه بالتعيين في لجنة تسيير شالتو لجنة انتخابات المريخ.
· محل ما قبل شالوه.
· عشان تاني يا حازم مصطفى تتكلم في الهلال.
· حازم شالوه ناسو.
· بالانتخاب شالوه.
· بالتعيين شالوه.
· والهلال ولا بتعب يدخل في مواضيع صغيرة زي دي.
· ناس المريخ عندهم ثلاثة رؤساء غير الرئيس طوالي جمال الوالي .. وعاوزين حميدتي يجيب ليهم (النجيلة).
· رؤساء قاعدين ساكت.
· اذا كان (النجيلة) بجيبها حميدتي عاملين ليكم ثلاثة رؤساء في شنو؟
· والله ناس الغربال وليليبو وياسر مويس وجارجو يلقوا النجيلة (التركية) دي … الهدف الخامس في المريخ تاني تسمع بيه وأنت واقف في الصف.
· قبل ما تدخل الاستاد.
· ناس صلاح نمر الكلام دا ما بقدروا عليه.
· الشائعات ما بتحلكم.
· النجيلة (التركية) الزلقيب بكتر فيها .. وناس كرشوم ما حمل الكلام دا.
· انتوا مجانين.
· ناس جارجو وليليبو ديل في (اسمنت عطبرة) عملوا العجب .. عاوزين كمان تجيبوا ليهم نجيلة (تركية).
· انتوا ما عندكم رأس؟
· والله نحن منتظرين النجيلة دي قبل المريخاب.
· ومنتظرين اول قمة تجمع بين الهلال والمريخ في استاد المريخ.
· دا ح يكون يوم عيد للهلال.
· ناس المريخ ديل علموا أي شيء.
· كررت ليكم الكلام دا كتير.
· وعاوزو يقع ليكم.
· المريخ في التسجيلات الماضية عملوا ليهم (سيرة) وأعلنوا عن تسجيل تسعة محترفين.
· كل مرة (زارف مصطفى) يظهر مع لاعب.
· وهاك يا صور.
· وكلام.
· الكان بعمل فيه (زارف مصطفى) مع مروان السعيدي وبومال وغيرهم من محترفي الغفلة عمله ابوجيبين مع ناس التش ورمضان عجب وبيبو.
· طيفور ما قدروا عليه.
· لا الرئيس مشترك حازم.
· ولا الرئيس مشترك ايمن ابوجيبين.
· تسجيلات حازم للمحترفين هسع طلعت أي كلام وتسجيلات ابوجيبين للوطنيين برضو ح تطلع أي كلام.
· أي محترف سجله حازم هسع بقوا يحتفلوا عند انهاء التعاقد معه.
· حازم يسجل.. وابوجيبين ينهي في العقود.
· وفي الحالتين كانوا بعملوا حفلة وبعتبروا الموضوع انجاز.
· اول مرة اشوف لي فرحة وسيرة في انهاء تعاقد.
· يا حليل سوداكال.
· سوداكال ما كان عندو كلام زي دا.
· الرئيس مشترك سوداكال للأمانة تسجيلاته كلها كانت ناجحة… الله فكانا منو.
· أي لاعب وطني نجح في المريخ جابو سوداكال .. من كرشوم لغاية عمار طيفور والصيني.
· وتيري والتش.
· حتى انتوني افضل محترف جاء للمريخ في السنوات الاخيرة جابو سوداكال.
· تسجيلات (زارف مصطفى) عمرها في الملاعب (20) دقيقة ما اكتر من كدا.
· مروان السعيدي … دخل المريخ وطلع زي تصوير المستند.
· عليك امان الله لعب عشرين دقيقة .. المريخاب نفسهم اتقطع.
· موضوع الليبي محمد المنير طبعا سوداكال عاملو قصد.
· زول ما شاف السودان إلّا عندما لعب ضد المريخ .. مع ذلك قبض من المريخ 400 الف دولار.
· محمد المنير ما شاف المريخ شال منو 400 الف دولار وعاوزين يمنحوا عمار طيفور بعد ان قدم كل ذلك العطاء للمريخ 100 الف دولار.
· الحفر كتير في المريخ.
· أي رئيس في المريخ بحفر للتاني.
· فريق فيه (3) رؤساء .. الحكاية شنو؟
· دا فريق وإلّا صندوق خيري كل شهر على زول.
· ناس المريخ مع هذا الوضع لقوا الموضوع مقفل.
· المحترفون ما فيهم كلمة.
· الوطنيون.
· والنجيلة.
· والإضاءة.
· قالوا يقبلوا على السوباط.
· مزمل قال يشوف ليه (قنبلة) كبيرة .. قنبلة ابوجيبين ما علمت شيء.
· ونحن اصلو ما بنقيف عند زول.
· وما عندنا زول فوق القانون.
· يمشي من يمشي.
· ويبقى الهلال.
· بس الموضوع عشان يمشي ما تعملوه بالطريقة دي.
· الاساعة عمرها اقصر من عمر مروان السعيدي مع المريخ.
· اقصر من عمر الليبي محمد المنير.
· هو اسمو محمد المنير .. والله ما عارفو .. لكن الزول دا القروش الشالها من المريخ .. ناس زيكو وكمال عبدالغني وحامد بريمة الخدموا المريخ اكثر من (10) سنوات ما شالوها.
· مزمل ما عندو حاجة مشت في الهلال.
· من والي قطر .. والموضوع مكشوف.
· السوباط ليس هو سوداكال ولا هو حازم ولا هو ابوجيبين عشان تحركوه زي قطعة الشطرنج.
· الهلالاب عندهم جمعية عمومية.
· وعندهم لجنة انضباط شغالة.
· واي زول في الهلال برحب بالمحاسبة.
· وما في كبير على الهلال.
· وما في كبير على القانون.
· ولا في كبير على البلد دي.
· ………………………
متاريس
· الليلة ان شاءالله شكلها ح تنقط.
· وح تمطر (حصو) عديل كدا.
· خليكم قرّاب.
· لو نقطت تاني ما بتقيف.
· حملة اعلام المريخ على التحكيم هل تنعكس على الفريق اليوم في كوستي؟
· الصيني مفروض ينزل تمارين مع الهلال عشان يكون في الفورمة.
· التسجيلات قربت.
· السوباط قال قاااعد .. احسن تمسكوا في (نجيلتكم) قوي… قبل تلحق طيفور.
· ابقوا عشرة على (قلاب الرملة).
· وكأس فضيل.. ما ح تطلعوا بي حاجة غيرو.
· ….
· ترس اخير : في ريحة زلط قطعوه.
