داليا الياس تكتب … تاكلوا ضلعنا وتنسوا وجعنا؟!!
ارفقت الصحفية داليا الياس صورة الشيف والناشطة المجتمعية رانية مجد الدين علي صفحتها في فيس بوك وكتبت تحتها المقال التالي :
Rania Magdeldin
عاملة فيها (سلة غذاء العالم)
الداير فسيخ والداير زغنى والداير ضلع والداير كنافة…. توزع ساااااى بالأكياس الكبيرة والناس تلحس فى الصحون وتتمطق.. ربوا جضوم من وراها!!!
لما عمو (مجدى) الله يرحمه مات وكسر ضهرها ربنا يتقبله القبول الحسن…. ألف زول من اللهطوا ديل ما عزوها يعلم الله… رغم إنها رجلها طويلة مع الكل!!!
وحقيقة مافى أغلى وأصعب وأسوأ من فقدان الوالد والوالدة الكانوا سندك وأمانك وضلك وبركتك
أنا شخصياً ما زولة لوامة نهائى… ومتسامحة جداً… وبقصّر فى الناس كتير…وبنسى الشين سرعة.. لكن تقييمى وترتيبى للعلاقات بعد وفاة أمى إختلف جداً غصباً عنى
دحين نصيحه لوجه الله… نفسك فى حاجة من ( مطبخ رنوش) راجع نفسك وإتفقد رسايلك… شوف روحك عزيت رانيا فى أبوها ولا لا… عشان لو هى سكتت… أنا غايتو مابسكت!!
تاكلوا ضلعنا وتنسوا وجعنا؟!!
اللهم يرحم موتانا… ويوسدهم الباردة… ويجعل الفردوس الأعلى مقامهم… ويورد كل من مس ذكرياتهم وتغول على آثارهم مورد الهلاك العظيم بإذن الله
د(اليا) س
